Hekk kif tidħol fis-sit in­kwistjoni, l-ewwel ma jilqgħuk huma kliem li hemm miktubin fuq nett li jgħidu “Id-Dehriet tas-Sinjura ta’ Borg in-Nadur”. Il-kelma “Sinjura” hija referenza ċara għall-Madonna.

L-aħħar messaġġ li hemm f’dan is-sit iġib id-data tat-8 ta’ Awwissu li għadda, fejn din id-darba, il-Madonna għad­diet messaġġ mix-Xewkija f’Għawdex. F’dan il-messaġġ partikolari, il-Madonna qalet hekk: “Ersqu lejn Ibni Ġesù, uliedi. Hu kuljum permezz tas-saċerdoti, jersaq qrib tagħkom. U tarawh ta’ spiss ukoll, uħud minnkom, fuq il-pala ta’ id Angelik. Iva, qed jiġi apposta għalikom għax irid jitħallat magħkom. Ħafna minnkom ma jersqux lejn il-Knisja. Għalhekk qed jiġi hawn, għax irid li Hu jersaq lejkom. Irid jgħix fikom u qrib tagħkom.”

Il-Madonna kompliet tgħid, “Iva, uliedi, itolbu għal xi persuni li l-Knisja għandha bżonn­hom ħafna biex dawn il-magħżulin tiegħi jressqu lin-nies lejn is-saċerdoti u lejn l-Ewkaristija. Iva, uliedi, hawn minnhom qegħdin fostkom. Itolbu ħafna għalihom.

“U nixtieqkom ukoll titolbu għal dawk li hemm madwar Angelik, għat-Theotokos, ħalli jissaħħu huma bej­nie­thom, ħalli wara jkunu jistgħu jsaħ­ħu lilkom, uliedi. Jien għażil­thom apposta għalija, għali­kom u għall-Knisja. Dawn hu­wa rigal għalikom, biex intom tistgħu titgħallmu minnhom. U anke, huma wkoll rigal għall-Knisja għax bl-eżempju tagħhom iridu jgħinu u jibdlu l-Knisja.”

F’dan il-messaġġ il-Madonna tkellmet ukoll dwar is-serq u qalet hekk: “Dawk li stagħ­new ħafna, dawk li għandhom ġid li lanqas biss jafu minn fejn se jibdew jgħodduh – kollox ġa­bu bis-sewwa jew ġie b’xi inganni? Jew forsi biex stagħnew huma bata ħad­dieħor? Mhux ħaġa kbira uliedi. Is-serq li jsir minn fuq il-postijiet tax-xogħol, xi tgħidu għalih ulie­di? Tgħidu: ‘U dak għandu ħafna. Mhux se jħossha. Il-farka tiegħi se jħoss? Lanqas biss jaf x’għan­du!’

“Iva, uliedi, dan serq. Dan kollu tridu trodduh lura. Għal­xejn tmorru tqerru jekk ma terġgħux trodduh lura. Li mhux tagħkom, mhux tagħ­kom. Kif għandek il-jedd li taq­bad u tieħu int? Trid li xi ħadd jeħodlok xi ħaġa minn tiegħek?

“Intom tgħidu; jien ma għandix ħafna x’jista’ jeħodli! Dan għandu! Uliedi, min fostkom qiegħed hawnhekk u b’mod speċjali seraq lil ħuh jew lil oħtu biex stagħna hu, u qarraq, min fostkom seraq affarijiet minn fuq il-post tax-xogħol, qisu li ma tibqgħux hekk. U tinsewx, tridu troddu lura. Għalhekk bagħatni hawn illejla Ibni Ġesù, ukoll. Iva, uliedi, għalhekk, biex inneħħilkom il-għamad minn quddiem għajnejkom. Forsi m’intomx tindunaw li qegħdin tiżbaljaw.”

Għal darb’oħra, il-Madonna temmet il-messaġġ tagħha billi qalet, “Grazzi uliedi, talli smajtu s-sejħa tiegħi.”

Dan kien it-tieni messaġġ tal-Madonna li ttella’ fuq dan is-sit. L-ewwel messaġġ tal-Madonna jġib id-data tal-4 ta’ Awwissu, u kien sar f’Borg in-Nadur.

Dakinhar “Is-Sinjura” kie­net qalet li fil-post “dalwaqt tinħoloq in-nixxiegħa tal-il­ma minn hawn fuq. Hi stess toħloq mogħdija minn fejn tgħaddi, u hi stess tirriserva ruħha. Iva, dan l-ilma se jibqa’ jiġi għal xi żmien, kif għed­tilkom.

“Jieqaf u jerġa’ jibda ġej. Iva, permezz tiegħu se jibdew ifiqu ħafna nies u l-ilma ma jinfetta ruħu qatt. Ħaġa waħda biss ngħidilkom, ulie­di: dan l-ilma qatt ma jista’ jiġi mibjugħ, qatt! Inkella jieqaf.”

Dwar dawn l-allegati messaġġi l-orizzont kien ikkun­­tatt­­ja lill-kelliem tal-Knisja Maltija. Il-kelliem kien qalilna li l-pożizzjoni tal-Knisja f’dawn il-każi hi li tosserva, tiġbor l-informazzjoni, tagħ­mel dixxerniment spiritwali, tikkonsulta mal-esperti u tirrelata lill-Kongregazzjoni kom­pe­tenti tas-Santa Sede.

L-istorja ta’ Borg in-Nadur kienet bdiet f’Jannar tal-2006, meta fuq wiċċ statwa tal-Kunċizzjoni li mart Angelik kienet xtrat ftit tal-jiem qabel dehru dawk li ġew deskritti bħala “dmugħ tad-demm”. Kien tliet xhur wara, meta allegatament il-Madonna għamlet l-ewwel deherha tagħha lil Angelik.

Skont l-istess sit, dawn l-allegati dehriet għadhom għaddejjin sal-lum. Min-naħa l-oħra, fuq is-sit youtube, wie­ħed jista’ jsib diversi filmati ta’ Angelik fuq l-għolja ta’ Borg in-Nadur.

Filmat partikolari juri li fit-18 ta’ Lulju ta’ tliet snin ilu, ħarġet xewka minn ħalq Angelik.

Il-filmat juri lil x’ħin seħħ dan kollu, Angelik kien imdawwar b’numru ta’ nies.

Wara li ħarġet din ix-xew­ka dawk preżenti bdew ikantaw l-“Ave Marija”.

Filmat ieħor fuq youtube juri li nhar id-9 ta’ Lulju tal-2008, Angelik beda jistabat mal-art, wara li allegatament kien attakkat mix-Xitan. Filmat ieħor juri li fit-13 ta’ Lulju tal-2008, Angelik kellu viżjoni tal-infern.

Allegatament kull nhar ta’ ġimgħa – il-ġurnata li fiha Kristu għadda mill-passjoni u miet – fuq il-ġisem ta’ Angelik bdew jitfaċċaw il-pjagi ta’ Kristu.

Huwa allegat li mill-istess pjagi ġieli toħroġ fwieħa ta’ ward u balzmu.